محمد قرواش
تخيلت الدنيا زربية ومخالفة لخطوط
بقيت نشوف فيها وعجبني لحال
فيها جميع شكال ولون لي تحب فيها محطوط
وما كنت نضنها تغدر ولا تجيني في لبال
شي بغاتو وعطاتو وفيها طلع لحيوط
وشي خلاتو درويش عايش على قد الحال
أفففف عليك يادنيا وعلى لي تاق فيك
نحسبو مسخوط تعطيه حتى يوالف وتكلعي ليه وتخليه يسال
حيرتي الناس لعقال حارو وما فكو ليك خيوط
وبقيتي غامضة ومغمضة وشديتي راس لمال
جمرك حامي يادنيا ولبرد زايد عليه يسوط
تبقا الناس فيك تشوف غير من بعيد
وقربك محال
مادا منهم تاقو فيك وحسبوك عسل
فسواني محطوط يلحسو كيف بغاو
وضنوه دايم وما يدوم حال
علاش علاش يادنيا عليتي
وماوصلك داك لمزلوط عيا يتراما ليك
ومن كثر همومو لقلب تكال
روفي ياللا ومن شواطك عطينا غير نص
شوط نعيشو فرحة نمحيو الهم لي فدواخلنا
جال مالك مالك قصيتي علينا ووضعتي شلا من شروط
وحلفتي ما تلياني وخى يقولو فيك لقيل ولقال
ما بقينا نعرفوك يامك مزروبة وقتك صبح مخلوط كلشي مهموم وعامر شؤوم ولعقل مسافر وفين ظال.
