كلام نقولوه :” الطريق الى سيفيل ..”

عادل ايت بوعزة – جديد مراكش .

إنه اليوم المشؤوم .
إنه اليوم المعهود .
انه لقطة التلاقي بين خيط التشاءم و خيط التفائل .
إنه يوم النحس , إنه حج غير معلن , رحمنا الله جميعاً و غفر ذنوبنا .
إنه المؤشر الحقيقي للإصلاح , إنه المعيار الوحيد لتعي في اي بلد تعيش .. ؟
زيارة خفيفة الأمس لمستعطلات إبن طفيل بمدينة مراكش , اقامت بدون شك ثورة دهنية , و حدفت اخر الامال المعلقة , و أكدت ان كل ما سمعته عن هذه المستعجلات لا يعدو سوى مزحة مقارنةً بالواقع …
“منتصب القامة امشي , مرفوع الهامة امشي” , هكذا عادة أدخل كل مؤسسة عمومية خصصت للمواطنين .. لكن في ” سيفيل ” أوقفنيسيكيرتي …” فين غادي ؟ ” … عيناه متصلبتان و لغته حاسمة , تماماً كبدر هاري عند وقوفه في الحلبة .. تشعر انه يستحيل دخولك بدون شيئ ما .. فيما بعد إكتشفت أن تأشيرة الدخول الى مستعجلات سيفيل تكون ” وجهيات أو إكراميات ” او هما معاً .
ما علينا , لن أقول كيف دخلت , لكنني محظوظ لأنني بدوري ” كنعرف نغمق ” … غير أن العشرات من الدراويش , تركتهم في الباب و لهم مصالحهم .. لكن بدر هاري أوقفهم .. ” بدر هاري غير في الشوفة لا تمشيو غالطين .. اما راه الله غالب ” .
عند الوهلة الاولى , و عند اول نظرة لم اقع في الحب . وقعت فقط في الصدمة .. تمنين انني ” ما غمقتش على بدر هاري ” , حينها عرفت انه اليوم المشؤوم , وراء الباب هناك سوريا و هناك الإقتتال و هناك كابول حيث القاعدة و بغداد حيث الاكراد و الشيعة و السنة , إنها بؤرة التوثر , ” كلشي مخنزر ” و ” كلشي كيشكي ” سواء المرضى أو عائلاتهم .. الممرضين و الأطباء و الإدارة .. الكل يشكي … و من نجى من هناك و خرج سالماً معافاً ف” شي صدقة دارها ” . اما الوضع ميؤوس منه بشكل لا يصدق .
إنه حقاً أسوء نظام صحي مؤدى عنه في العالم … ” باش نشرح ليكم اكثر ” :
منين الله يحفظ , كيكون زهرك منحوس , و ماعندكش الفلوس باش تمشي تداوي في الكلينيك .. تتجه لسيفيل و إلا كانت حالتك مستعجلة كيديويك لمستعجلات إبن طفيل . و لابدا خاص يجي معاك شي حد باش تداوى . اما الا جيتي بوحدك فمصيرك هو انك تبقى مليوح تماك و ماكاينش لي يديها فيك … منين كيجي معاك شيئ واحد . فهذا الواحد خاصو يدخلك لمستعجلات و يلوحك فشي بلاصة . إلا عندك الزهر بزاااااااااف . غادي يلقى ليك شي ” بيااااص ” تجلس فيه , و الا ماعندكش الزهر شي شوية غادي تلقا شي كرسي من دوك الكراسة ديال الميكة . هادشي غير باش تأنسطالا بحال شي لوجيسيال . من بعد غادي يخص هذاك السيد لي معاك يمشي يسجلك , و هذا العملية بوحدها كتحتاج بزاف ديال الوقت , و طبيعة الحال واخا تكون حالتك مستعجلة فإذا لم تكن تحتضر فخاصك تخلص عاد تداوا .. و لي ماخلصتيهاش ما تلقهاش .
في سيفيل كلشي ممكن و كلشي مستحيل , هادشي علاش قلت انه “حج غير معلن ” لأنه مكان يجعلك اكثر تمسكاً بربك و متخشعاً , و كلشي فيه كيدعي . شي كيدعي على الإدارة . شيئ كيدعي على الاطباء . شي كيدعي على بدر هاري , و شي كيدعي على الوردي , و شي كيدعي على البنفسجي .. و شي كيدعي على زهرو ملي لقا راسو مغربي .. ملحمة دينية بإمتياز يمكن تلقا بحالها غير في الحج و لا العمرة ديال عيد المولد النبوي .
الوقت لي كتدخل لسيفيل , كتفهم مزياااان , علاش الناس كيفضلو ” الجبار ” ديال دوار السلطان على طبيب العظام في سيفيل , كتفهم علاش الناس كيفضلو بويا عمر و مولاي إبراهيم على مستشفيات المغرب النفسية و علاش كيديرو ” المخينزة ” علا انهم يمشيو لشي سبيطار باش يداويو السخانة … كتفهم جيداً ان الدروس لي قرينا في الإبتدائي , ديال ” المريض يذهب للمستشفى للعلاج ” هي فكرة خاطئة .
الوضع في سيفيل , خطير جداً , و مع الوقت الامور غادة و كتكفس , و الدليل هو ان واحد الصحافي لبارح , بهدلوه فقط لانه حاول يصور داخل المستعجلات , الامر لي خلاه يمشي يتبهدل في الكوميسارية و دغيا وجدو ليه 5 فرمليات ستاجيرات , باش يشهدو ضدو , الامر تماماً كما في بعض المدن الاكثر دماراً في سورياً , حيث تعتبر مناطق معزولة و يمنع دخولها من طرف مدنيين او صحافيين أو غيرهم .. يخفون و لا يقدرون على عدسة الصحافة لان الواقع ما فيه ميتشاف .. بحال تماك بحال سيفيل ايظا الواقع ما فيه ميتشاف .
اقصى درجات النحس , هي تطول المدة ديال تواجدك في ” سيفيل ” , خصوصاً إلا ماكنتيش مجروح و مضروب في شي كسيدة , لأنك غادي تكون محضوظ إلا كنتي “جاي ” بكسيدة , لأنه لو كان عندك شي مرض عضوي , غادي تحتاج تكون كتدرب على الماراطون باش تقدر تقاد الاوراق ديالك و يديرو ليك التحاليل , هادشي بطبيعة الحال إلا عندك الزهر ,, أما راه بعض المرات ماكتلقاش حتى معامن تهدر , إلا كنتي محضوظ و زهرك زوين , غادي تلقا اطباء و ممرضون , غادي يسعادوك في شوية , أما إلا كان الإضراب , ” غير بدل الساعة بأخرى ” .
“غفل , طارت عينيك ” القاعدة الاولى لي خاص أي واحد عندو مريض يتعلمها في سيفيل , صراع دائم بين المرضى و العائلات ,, كيدابزو على النوبة و على البياص و على البلاصة , و على الهدرة مع الطبيب .. و غالباً إلي عندو شي ضرسة و غير ناب في سفيل كيعيط ليه , وخا يكون غير هادوك لي كيجرو ” البياصات ” و لا ” سيكيريتي ” و هادو حسب ما شفت كلمتهم كتكون مسموعة في السبيطار . هادو كينوبو على الإدارة , لان الإدارة ماكتشوفهاش غير في الندوات و في الصالونات في شي فندق 5 إيطوال , للنقاش حول ” نجاعة التغطية الصحية … راميد نمودجاً ” . كلهم ينوهون بنجاعة النظام الصحي في الفنادق , لكن في ذات الوقت , العشرات من المواطنين الدراويش ما لقاوش حتى غطاء ينفعهم من ” الضس ديال الكولوار ” .
هذا الوضع و اكثر يمكن تفهمه بشكل سلس , بشكل عادي جداً , و اي عاقل لن يلوم احد بإستثناء الحكومة التي أتت من أجل العمل على إصلاح القطاع الصحي كما إدعى رئيسها خلال احد اللقاءات الصحفية قبل الإنتخابات التشريعية الماضية . الكل و انا افهم ان مستشفى وحيد بجهة مراكش -اسفي للخدمات الجراحية , يستحيل ان يقدم خدمات تسمو لمستوى ” الكرامة الإنسانية ” .
كل من قرأ هذا و لم يذهب الى هناك يوما ما , سيعتبر ان كلامي فيه الكثير من المبالغة , لكنني لست بحاجة لدليل على ذلك و إذهب الى هناك و الى خلاك بدر هاري تدخل … ها وجهي ها وجهك .