مزيان تكون تعيش في دولة فيها جوج بحورا ؛ وتشري السردين بربعين درهم ؛ مزيان الشهر الي كيكملو المواطن بالكريدي يشري التفاح ب 15 والتفاح ديال الدراوش ؛ يمكن السردين داير الاضراب ومقطوع وما يبغيش يتصيد بحالنا و داير لراسو العز ؛ واحد المرة مشيت لطانطان وسولت بشحال السردين وكبيلة حيت هما الانواع الي كنعرفو في الحوت حيت الحوت المزيان يتصدر لبراني و كتفرقو فلوسو في اطار الاتفاقيات و الملاقي فاقي و داك الشي؛وهو يجوبني واحد

الكابيلة كتكلوها ؛قلت ليه راه دايرة عشرة دراهم لكيلو ؛جاوبني باستغراب وسكت؛ قلت ليه والسردين راه كيوصل حتى لثلاثين درهم في رمضان ؛ وهو يزيدو في ضحكو ؛ وقال ليا  الكابيلة مكيكلها حتى واحد اما السردين الى غلا ثلاثة دراهم ؛ هاديك الساعة عرفت بلي الناس لي ساكنين الوسط ماشي بحال لي ساكنين في الجناب ؛ واخا دولة وحدة كل وزهرو وكلا و مكتوبو ؛ و الارزاق بيد الفراق .

ايه كون كنا من صحاب الزيروات و لا كنخلصو 50 لساعة ديك الساعة يدير السردين 40 درهم و يحنيو ليه كاع ؛ واعرة بزاف تحس بالحكرة وبالندم ملي تشري كيلو سردين بربعين درهم و تخنز بيه الدار ونتا خدام بستين درهم و لا مخدامش ؛ زوينة تكون في دولة كيشجعوها وكيعتابروها من الدول المثالية في المعقول و التقدم في افريقيا و حالة ناسها كتبكي ؛

من حق السردين يدير الثمان ومن حق البصلة تولي غلى من البنان و من حق مطيشة تحترمها شوميشة ؛ومن حق الحامض يدير بلاصتو في التلفزة؛ كيفما قال الجمل ما نايضش ما نايضش غير زيدو عليا ؛

رحمونا راه دينا غير الشوهة اما نتوما ديتو الباينة والمشبوهة ؛ نص في السما و كلشي في لرض و لحوت في الما ؛ والفوسفاط والي دوى الزمان والزلاط.

رشيد العماري